Կրթական ծրագրերի կենտրոն Կրթության, գիտության, մշակույթի և սպորտի նախարարություն

Ապրիլի 21-22-ին Համաշխարհային բանկի թիմը Կրթական ծրագրերի կենտրոն ԾԻԳ-ի աշխատակիցների ուղեկցությամբ այցելել է Երևանի և ՀՀ Արագածոտնի մարզի Բյուրականի, Օհանավանի միջնակարգ դպրոցներ, եղել ՀՀ Արմավիրի մարզի Փարաքարի միջնակարգ և Վաղարշապատի թիվ 12 հիմնական դպրոցներում : Այցերի համատեքստում ՀԲ-ի կողմից ֆինանսավորվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակներում իրականացված և ընթացիկ աշխատանքների դիտարկումն էր: Այցերի նպատակն էր նաև հանդիպել դպրոցների տնօրենների, ուսուցիչների և նախակրթարանների սաների հետ՝ ծանոթանալու իրականացված աշխատանքների արդյունքներին:
Առաքելության կազմում էին Առաջադրանքի թիմի համաղեկավար, Շիզուկա Կոնիմոտոն, Կրթական ծրագրերի կենտրոն ԾԻԳ-ի ծրագրի ղեկավար Արմինե Խաչատրյանը, 1.1 ենթաբաղադրիչի ղեկավար Ռուզաննա Խաչատրյանը և 1.3 ենթաբաղադրիչի ղեկավար Մհեր-Մելիք-Բախշյանը: Համաշխարհային բանկի պատվիրակությունն աշխատանքային այցը մեկնարկել է Բյուրականի միջնակարգ դպրոցում, որտեղ 2026 թվականին հիմնվել է նոր նախակրթարան։
Համաշխարհային բանկի պատվիրակությունը ԿԾԿ ԾԻԳ ներկայացուցիչների և դպրոցի աշխատակիցների ուղեկցությամբ շրջել է նախակրթարանում, ծանոթացել կատարված աշխատանքներին, զրուցել ուսուցիչների հետ։ Նախադպրոցական տարիքի երեխաներն իրենց օրերն անցկացնում էին հարմարավետ գեղեցիկ ու գունեղ սենյակներում՝ լի ուսումնական նյութերով ու խաղալիքներով։ Համաշխարհային բանկի պատվիրակության հաջորդ կանգառը Օհանավանի միջնակարգ դպրոցում էր, որտեղ ստեղծվել էր նոր նախակրթարան: Հյուրերը նախակրթարանի տնօրենի ուղեկցությամբ շրջեցին խմբասենյակներով, եղան նախակրթարանի բակում: Տնօրենը ներկայացրեց նախակրթարանի ստեղծման ընթացքը, խոսեց հաղթահարված դժվարությունների ու առաջիկա անելիքների մասին: Նշենք, որ 20 երեխայի համար նախատեսված նախակրթարանը ծրագրի իրականացման արդյունքում կահավորվել է համապատասխան ժամանակակից գույքով, սարքավորումներով, ապահովվել է մանկական գրականությամբ, ուսումնական նյութերով ու խաղալիքներով: Իրականացվել է նաև դաստիարակների վերապատրաստում: Նախակրթարանն ունի հարմարեցված միջավայր:
Նախակրթարանում շրջայցն ամփոփելուց հետո ՀԲ ներկաները շարունակեցին այցը ՀՀ Արմավիրի մարզի Վաղարշապատի թիվ 12 հիմնական դպրոցում, որտեղ մարտից իր գործունեությունն էր մեկնարկել նորաստեղծ նախակրթարանը:Հյուրերն այցն ամփոփեցին Փարաքարի միջնակարգ դպրոցում, որտեղ ևս բնականոն գործում է նոր նախակրթարանը: Հյուրերը տպավորված էին վերջնական արդյունքներով և ստեղծված պայմաններով։