Նորություններ
Աշխատանքային այցեր նորաստեղծ նախակրթարաններում
07.11.2025
Նոյեմբերի 5-ին և 6-ին «Դպրոցին երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում» ենթաբաղադրիչի դրամաշնորհների համակարգող Արմեն Մարտիրոսյանը և ինժեներ - խորհրդատու Վռամ Բոյաջյանը աշխատանքային այցեր են իրականացրել ՀՀ Կոտայքի մարզի Գավառի Պ. Ղանդիլյանի անվան թիվ 2 միջնակարգ դպրոցում, Գավառի Հ Թումանյանի անվան թիվ 3 հիմնական դպրոցում և Մարմարիկի միջնակարգ դպրոցում, որտեղ սեպտեմբերի 1-ից պաշտոնապես բացվել էին ‹‹Կրթության բարելավման ծրագրի լրացուցիչ ֆինանսավորում›› վարկային ծրագրի շրջանակում հիմնված նորաստեղծ նախակրթարանները: Այցի նպատակը վերոնշյալ կրթօջախներում միկրոծրագրերի շրջանակներում ստեղծված նախակրթարանների գործունեությանը ծանոթանալն էր: Առաջին կանգառը Գավառի Հ. Թումանյանի անվան, թիվ 3 հիմնական դպրոցն էր, որտեղ ԿԾԿ ԾԻԳ-ի աշխատակիցներին ողջունեց դպրոցի տնօրենը: Տնօրենը կարևորեց դպրոցում իրականացված ծրագրի նշանակությունը սաների կրթության և դաստիարակության գործում: ԿԾԿ ԾԻԳ-ի աշխատակիցները նախակրթարանի տնօրենի ուղեկցությամբ շրջեցին խմբասենյակներով, եղան նաև նախակրթարանի բակում: Տնօրենը ներկայացրեց նախակրթարանի ստեղծման ընթացքը, խոսեց հաղթահարված դժվարությունների ու առաջիկա անելիքների մասին: Նախակրթարանը, ծրագրի իրականացման արդյունքում կահավորվել է համապատասխան ժամանակակից գույքով, սարքավորումներով, ապահովվել է մանկական գրականությամբ, ուսումնական, ուսուցողական նյութերով ու խաղալիքներով: Իրականացվել է նաև տնօրենի և դաստիարակների վերապատրաստում: ԿԾԿ ԾԻԳ-ի աշխատակիցները եղան նաև Մարմարիկի և Գավառի թիվ 2 միջնակարգ դպրոցներում, որտեղ ևս սեպտեմբերի 1-ից գործում են նորաստեղծ նախակրթարանները: Իրականացված աշխատանքների արդյունքներն տեսանելի են և փաստում են միկրոծրագրերի կարևորության և արդյունավետության մասին: Հավելենք, որ այս տարի արդեն իսկ հիմնվել են թվով 20 նախակրթարաններ ՀՀ մարզերում և Երևանում :
