Կրթական ծրագրերի կենտրոն Կրթության, գիտության, մշակույթի և սպորտի նախարարություն

Այս ուսումնական տարում  կբացվի 19 նոր նախակրթարան`  11 –ը Երևանում, իսկ 8-ը  ՀՀ մարզերում: Ուսումնական տարվան ընդառաջ ՀՀ ԿԳՄՍ ‹‹Կրթական ծրագրերի կենտրոն›› ԾԻԳ-ի ‹‹Դպրոցին երեխաների պատրաստվածության բարձրացում և կրթության հավասար մեկնարկային հնարավորությունների ապահովում›› ենթաբաղադրիչի աշխատակիցները այցելել են նախադպրոցական միկրոծրագրերում ընդգրկված կրթական հաստատություններ: Աշխատանքային այցերի նպատակը իրականացվող նախադպրոցական միկրոծրագրերի մշտադիտարկումն էր: Հիշեցնենք, որ նախադպրոցական միկրոծրագրերում ընդգրկված կրթական հաստատություններում հունիսից մեկնարկել են շինարարական աշխատանքները: Աշխատանքային այցերի շրջանակներում կատարված մշտադիտարկման արդյունքում ԿԾԿ ԾԻԳ-ի ինժեներ-խորհրդատու Վռամ Բոյաջյանը արձանագրեց, որ նախակրթարանների հիմնման համար ընտրված տարածքներում իրականացվել են նախահաշվով նախատեսված բոլոր աշխատանքները:
Ծրագրի արդյունքում իրականացվել են  ընտրված տարածքների վերանորոգում :Առաջիկայում նորաստեղծ նախակրթարանները կահավորվելու են անհրաժեշտ գույքով: Հարկ է նշել, որ իրականացվել է նաև դպրոցի տնօրենների և նախակրթարաններում աշխատող դաստիարակների վերապատրաստում:
Նորաստեղծ նախակրթարաններում պահպանվել են ներառական կրթության կազմակերպման բոլոր պահանջները՝ արդյունքում նախակրթարաններն ունեն հարմարեցված միջավայր սահմանափակ հնարավորություններով երեխաների կրթության համար։
Սաների համար նախակրթարաններն ապահովված են լինելու գեղեցիկ ու գունագեղ սենյակներով, հարմարավետ պահարաններով ու խաղալիքներով լի անկյուններով։