Նորություններ
Մեկնարկել է ընթացիկ դրամաշնորհային ծրագրերի ամփոփիչ մշտադիտարկումը
21.05.2025
Մայիսի 19-ին «Հայաստանի բարձրագույն կրթության Նորարարությունների մրցակցային հիմնադրամ»-ի շրջանակներում մեկնարկել է ընթացիկ դրամաշնորհային ծրագրերի ամփոփիչ մշտադիտարկումը՝ ՆՄՀ դրամաշնորհառու բուհերում: Առաջին հանդիպումը տեղի ունեցավ Երևանի պետական համալսարանում (ԵՊՀ): Մշտադիտարկումն իրականացնում էին «Կրթական ծրագրերի կենտրոն» ԾԻԳ-ի ներկայացուցիչները: Հանդիպմանը մասնակցում էր նաև ԿԾԿ ԾԻԳ-ին ԵՊՀ դրամաշնորհային ծրագրի ընթացքում մասնագիտական աջակցություն ցուցաբերող անհատ խորհրդատու՝ Արամ Պապոյանը: Աշխատանքային խմբի անդամներին ԵՊՀ-ի Ֆիզիկայի ինստիտուտում դիմավորեց դրամաշնորհային ծրագրի ղեկավար Ֆոտոնիկայի և արհեստական բանականության լաբորատորիայի վարիչ Մուշեղ Ռաֆայելյանը: Ներկաները դրամաշնորհային ծրագրի ղեկավարի ու համակարգողի ուղեկցությամբ եղան բուհի կողմից Օպտիկական միկրոհամակարգերի մշակման և հետազոտման գիտակրթական կենտրոնում: Նշենք, որ տարածքի վերնորոգվումը և կահավորումը իրականացվել էր ծրագրի նախորրդ փուլերում: Դրամաշնորհային ծրագրի շրջանակներում ձեռք բերված լաբորատոր սարքավորումները տեղակայված էին համապատասխան տարածքներում: Այցի ընթացքում ներկաները քննարկեցին լաբորատոր սարքավորումների հնարավորությունները: Մ. Ռաֆայելյանը մանրամասն ներկայացրեց իր տեսակով եզակի Կոնֆոկալ ֆլուորեսցենտային մանրադիտակի հնարավորությունները՝ փաստելով, որ սարքի միջոցով արդեն կատարվում են միջազգային չափորոշիչներին համապատասխան նոր հետազոտություններ: Ծրագրի ղեկավարի հավաստմամբ, գիտաուսումնական կենտրոնը համալրված լինելով անհրաժեշտ նյութատեխնիկական բազայով արդեն իսկ նպաստում է կրթության ու հետազոտությունների արդյունավետության բարձրացմանը ԵՊՀ-ում։ Հանդիպման ընթացքում մշտադիտարկման աշխատանքային խմբի անդամները դրամաշնորհային ծրագրի կառավարման անձնակազմի հետ քննարկեցին ծրագրի ժամանակացույցով նախատեսված գործողությունները և դրանց իրականացման ընթացքը: Ծրագրի ղեկավար Մ. Ռաֆայելյանը հավաստիացրեց, որ մի շարք քայլեր են ձեռնարկվել նաև կրթական գործընթացի բովանդակության արդիականացման ուղղությամբ՝ մասնավորապես հաստատման փուլում է նոր՝ «Օպտիկա և ֆոտոնիկա» մագիստրոսական ծրագիրը, ինչպես նաև ծրագրի շրջանակում ձեռք բերված սարքերի առկայությամբ պայմանավորված վերանայվել են բակալավրիատում դասավանդվող դասընթացներն ու առարկայական նկարագրերը: Մ. Ռաֆայելյանը շեշտեց, որ կենտրոնի մասնագետները համագործակցում են օտարերկրյա համալսարաններում աշխատող գործընկերների հետ՝ ձևավորելով գիտակրթական նոր կապեր կրթության, գիտության ու արդյունաբերության ոլորտներում: Հավելենք, որ կենտրոնի պաշտոնական բացումը տեղի կունենա առաջիկայում , սակայն մայիսի 12-ին՝ Երևանի պետական համալսարանում անցկացված «Հաշվետու գիտաժողով-2025»-ի շրջանակում, Օպտիկական միկրոհամակարգերի կենտրոնի գիտաշխատողներ Տաթևիկ Սարուխանյանը և Վահրամ Գրիգորյանը ներկայացրել են կենտրոնում կատարվող ընթացիկ հետազոտությունները:
