Կրթական ծրագրերի կենտրոն Կրթության, գիտության, մշակույթի և սպորտի նախարարություն

Նոյեմբերի 8-ին «Դպրոցին երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում» ենթաբաղադրիչի դրամաշնորհների համակարգող Արմեն Մարտիրոսյանը և Ճարտարապետ- խորհրդատու Վռամ Բոյաջյանը այցելեցին ՀՀ Շիրակի մարզի Գյումրիի թվով 7 հիմնական դպրոցներ, որտեղ սեպտեմբերի 1-ին պաշտոնապես բացվել էին ‹‹Կրթության բարելավման ծրագրի լրացուցիչ ֆինանսավորում›› վարկային ծրագրի շրջանակում հիմնված նորաստեղծ նախակրթարանները: Այցի նպատակը վերոնշյալ կրթօջախներում միկրոծրագրերի շրջանակներում ստեղծված նախակրթարանների գործունեությանը ծանոթանալն էր: Առաջին կանգառը Գյումրիի թիվ 4 հիմնական դպրոցն էր, որտեղ ԿԾԿ ԾԻԳ-ի աշխատակիցներին ողջունեց դպրոցի տնօրեն Ա.Այվազյանը : Տնօրենը կարևորեց դպրոցում իրականացված ծրագրի նշանակությունը սաների կրթության և դաստիարակության գործում: ԿԾԿ ԾԻԳ-ի աշխատակիցները նախակրթարանի տնօրենի ուղեկցությամբ շրջեցին խմբասենյակներով, եղան նաև նախակրթարանի բակում: Տնօրենը ներկայացրեց նախակրթարանի ստեղծման ընթացքը, խոսեց հաղթահարված դժվարությունների ու առաջիկա անելիքների մասին: Նշենք, որ 25 երեխայի համար նախատեսված նախակրթարանը այս տարի Գյումրիում ստեղծված 7 նախակրթարաններից մեկն է: Նախակրթարանը, ծրագրի իրականացման արդյունքում կահավորվել է համապատասխան ժամանակակից գույքով, սարքավորումներով, ապահովվել է մանկական գրականությամբ, ուսումնական, ուսուցողական նյութերով ու խաղալիքներով: Իրականացվել է նաև դաստիարակների վերապատրաստում: ԿԾԿ ԾԻԳ-ի աշխատակիցները եղան նաև Գյումրիի թիվ 9 , թիվ 20, թիվ 25, թիվ 41 հիմնական դպրոցներում, ինչպես նաև թիվ 8, թիվ 18 միջնակարգ դպրոցներում, որտեղ ևս սեպտեմբերի 1-ից գործում են նորաստեղծ նախակրթարաններ: Իրականացված աշխատանքների արդյունքներն տեսանելի են և փաստում են միկրոծրագրերի կարևորության մասին: Հավելենք, որ այս տարի արդեն իսկ հիմնվել են թվով 20 նախակրթարաններ ՀՀ մարզերում և Երևանում :