Նորություններ
ՆՄՀ դրամաշնորհով ստեղծված նորարարական կենտրոնները ներկայացան ԴիջիԹեք -2022-ին
31.03.2023
Երևանի Կ․ Դեմիրճյանի անվան մարզահամերգային համալիրում տեղի է ունեցել «ԴիջիԹեք-2022» ցուցահանդեսը, որին ներկայացուցչական տաղավարով մասնակցում էին տեղական ու միջազգային, փորձառու և սկսնակ բազմաթիվ կազմակերպություններ, բուհեր, քոլեջներ, ուսումնական կենտրոններ: Ցուցահանդեսի ընթացքում Հայաստանում և արտերկրում գործող կրթօջախները տարբեր տաղավարներով ներկայացնում էին իրենց կրթական ծրագրերը:
Մարտի 10-12-ն անցկացվող ցուցահանդեսի նպատակն էր ցույց տալ Հայաստանի տեխնոլոգիական ոլորտի ձեռքբերումներն ու զարգացման ներուժը:
Ցուցահանդեսին մասնակցում էին նաև ԵՊՀ կենսաբանության, մաթեմատիկայի և մեխանիկայի, քիմիայի, ֆակուլտետները, ֆարմացիայի ինստիտուտը՝ ներկայացնելով նշյալ ոլորտում իրենց գրանցած վերջին նվաճումները։
«Հայաստանի տեխնոլոգիական ապագան» ծրագրի տաղավարում համալսարանականները մի շարք այլ ծրագրերի կողքին ներկայացնում էին «Մանրէաբանական կենսատեխնոլոգիաների և կենսավառելիքի նորարարական կենտրոնը» և ԵՊՀ ֆարմացիայի ինստիտուտում գործող «Դեղապատրաստուկների որակի հսկման և մոնիտորինգի գիտաուսումնական կենտրոնը»:
Մասնակիցները ցուցահանդեսի շրջանակում կատարեցին տարատեսակ գիտափորձեր, պատասխանեցին ներկաների հարցերին: ԵՊՀ տաղավարում մանրամասն ներկայացվեց և` «Մանրէաբանական կենսատեխնոլոգիաների և կենսավառելիքի նորարարական կենտրոն»-ը և`«Դեղապատրաստուկների որակի հսկման և մոնիտորինգի գիտաուսումնական լաբորատորիան» : Նշենք, որ այս ենթակառուցվածքները ստեղծվել են ՀՀ ԿԳՄՍՆ Կրթական ծրագրերի կենտրոն ԾԻԳ-ի կողմից «Կրթության բարելավում» վարկային ծրագրի շրջանակներում` իրականացվող Նորարարությունների մրցակցային հիմնադրամի դրամաշնորհով` Համաշխարհային բանկի համաֆինանսավորմամբ: Ներկայացվեցին դրամաշնորհային ծրագրերի արդյունքում ձեռք բերված ժամանակակից սարքավորումների միջոցով արդեն իսկ իրականացվող գիտահետազոտական աշխատանքները: Համալսարանականների հավաստմամբ այս ենթակառուցվածքները մասնագետներին հնարավորություն են տալիս որակյալ գիտափորձեր անել և արդյունքներ ստանալ, դրանք բիզնեսն ու գիտական ներուժը կապող օղակն են:
Այսպիսով, ՆՄՀ դրամաշնորհով ՀՀ բուհերում ստեղծված բազմաթիվ ենթակառուցվածքներում այսօր ոչ միայն իրականացվում են գիտահետազոտական, նորարարական ծրագրեր, այլև ակտիվորեն իրականացվում են աշխատանքներ, որոնց արդյունքում ակնկալվում է ստանալ հետագա առևտրայնացման ներուժ ունեցող կարևոր գիտական նորույթներ: Այս ենթակառուցվածքների ստեղծումը և նման արդիական սարքավորումների առկայությունը բուհերում նպաստում են գիտահետազոտական նոր ուղղությունների խթանմանն ու ձևավորմանը, գործարար ոլորտի հետ փոխշահավետ համագործակցային կապերի սերտացմանը և պետության համար ռազմավարական նշանակություն ունեցող ծրագրերի իրականացմանը:
