Նորություններ

ՀՊՄՀ-ում բացվել է ապագա, մանկավարժների գործնական հմտությունների զարգացմանն ուղղված մուլտիմեդիոն լաբորատորիա

07.02.2020

«Խաչատուր Աբովյանի անվան հայկական պետական մանկավարժական համալսարան» հիմնադրամում (ՀՊՄՀ) փետրվարի 6-ին բացվել է ապագա մանկավարժների գործնական հմտությունների զարգացմանն ու կատարելագործմանն ուղղված մուլտիմեդիոն լաբորատորիան և երկու հետազոտական լսարանները՝ համալրված համապատասխան գույքով, մասնագիտական ծրագրեր պարունակող համակարգիչներով, ինչպես նաև ստեղծվել է էլեկտրոնային կրթական հարթակը՝ մշակված ուսումնաօժանդակ նյութերով և վիրտուալ գրադարանով: Այս ժամանակակից ենթակառուցվածքը ստեղծվել է Համաշխարհային բանկի համաֆինանսավորմամբ, ‹‹Կրթական ծրագրերի կենտրոն›› ԾԻԳ-ի կողմից իրականացվող ‹‹Կրթության բարելավում›› վարկային ծրագրի Նորարարությունների մրցակցային հիմնադրամի (ՆՄՀ) երկրորդ (հավելյալ) շրջափուլի շրջանակներում: Մուլտիմեդիոն լաբորատորիայի բացման արարողությանը ներկա էին ՀՊՄՀ-ի ռեկտոր Ռուբեն Միրզախանյանը, ‹‹Կրթական ծրագրերի կենտրոն›› ԾԻԳ-ի տնօրեն Գրիշա Հովհաննիսյանը, ՀՀ ԿԳՄՍ նախարարության Նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանը, ԾԻԳ-ի ներկայացուցիչներ, ոլորտի մասնագետներ, ինչպես նաև բուհի պրոֆեսորադասախոսական կազմի ներկայացուցիչներ և ուսանողներ: Մուլտիմեդիոն լաբորատորիայի բացման արարողության սկզբում ՀՊՄՀ-ի ռեկտոր Ռ. Միրզախանյանը ողջույնի և շնորհավորանքի իր խոսքում նշեց, որ դրամաշնորհային ծրագիրն իրականացավ «Կրթական ծրագրերի կենտրոն»-բուհ համատեղ աշխատանքի շնորհիվ:
«Մեր համատեղ աշխատանքի ու համագործակցության արդյունքում ստեղծվել է եզակի լաբորատորիա, որը հնարավորություն կտա համալսարանի և այլ ուսումնական հաստատությունների ուսանողներին ձեռք բերել մասնագիտացված գիտելիքներ, փորձառություն նախադպրոցական և տարրական մանկավարժության ոլորտում: Մենք համոզված ենք` կատարված աշխատանքի արդյունավետության հետագա ցուցանիշը կլինի բնագավառում մասնագիտական գիտելիքներով օժտված նոր կադրերի պատրաստումը››,-հավելեց ռեկտորը:
Ծրագրի ղեկավար, ՀՊՄՀ-ի ուսումնական աշխատանքների գծով պրոռեկոտոր Մհեր Մելիք-Բախշյանը խոսեց կատարված հսկայածավալ աշխատանքի մասին: Նա նշեց՝ ‹‹Այն ջանքերն ու եռանդը, որ ներդրվել են մինչ այժմ, հիմնաքարն են, որի վրա իրապես պետք է մեկնարկի բուն ծրագրի իրականացումը: Նորաստեղծ ենթակառուցվածքը ամուր կապ է ստեղծում համալսարանի և դպրոցների ու նախադպրոցական հաստատությունների միջև»,- հավելեց պրոռեկտորը:
Սկզբնական կրթության ֆակուլտետի դեկան Հեղինե Խաչատրյանը շնորհակալություն հայտնեց բոլոր կառույցներին, որոնք աջակցել են ծրագրի իրականացմանը և նշեց, որ նորաստեղծ լաբորատորիայի հնարավորություններն ուսումնական գործընթացում լավագույնս օգտագործելու նպատակով իրականացվել է նաև համապատասխան կրթական բովանդակության ստեղծում. բուհում առկա են լաբորատորիայի գործարկման ընթացակարգերը՝ այն է հայեցակարգը և կանոնակարգը, բարելավված հետազոտական բաղադրիչներով նախադպրոցական և տարրական մասնագիտությունների կրթական ծրագրերը, թվայնացված գրադարանը: Դեկանի խոսքով, լաբորատորիայի ստեղծմամբ ապահովվում է ծրագրի հիմնական նպատակի իրագործումը, այն է՝ նորարարական գործնական ու հետազոտական հմտություններով և կարողություններով, եվրոպական չափանիշներին համապատասխան մրցունակ կադրեր պատրաստել նախադպրոցական և տարրական մանկավարժության ոլորտում: ‹‹Այս ենթակառուցվածքի առկայությունը բուհում թույլ է տալիս նախադպրոցական և տարրական մանկավարժության ոլորտում ձևավորել մրցունակ գիտական և նորարարական ներուժ››,- հավելեց Հ. Խաչատրյանը:
Լաբորատորիայի բացման արարողությունն ամփոփվեց շրջայցով: Հյուրերը շրջայց իրականացրեցին նորաբաց լաբորատորիայում և լսարաններում, ծանոթացան կատարված աշխատանքներին և հետաքրքրվեցին ուսումնական և հետազոտական գործընթացում դրանց կիրառելիության մասին: Ներկաները շրջայցն ավարտեցին հետազոտական լսարանում, որտեղ ծանոթացան էլեկտրոնային կրթական հարթակի կիրառությանն ու ընձեռած հնարավորություններին և էլեկտրոնային թվայնացված գրադարանին:
Հավելենք, որ դրամաշնորհային ծրագրի իրականացման ընթացքի վերաբերյալ հրապարակումները հասանելի են նաև ‹‹Կրթական ծրագրերի կենտրոն›› ԾԻԳ-ի նախորդ հրապարակումներում, իսկ ծրագրի ընթացքի  և արդյունքների մասին  պատմող տեսանյութը հասանելի է հետևյալ հղմամբ՝ https://www.youtube.com/


 

Նորություններ

28.10.2026 Տավուշի մարզում շարունակվում են ԲՏՃՄ առարկաների ուսուցիչների մասնագիտական վերապատրաստումները Ժամանակակից լաբորատոր սարքավորումների արդյունավետ կիրառումը, գործնական ուսուցման զարգացումը և հետազոտահեն մեթոդների ներդրումը դպրոցական կրթության արդիականացման կարևոր նախապայմաններից են։ Այս ուղղությամբ իրականացվող աշխատանքների շրջանակում Տավուշի մարզում կազմակերպվել են ԲՏՃՄ առարկաների ուսուցիչների մասնագիտական վերապատրաստումներ՝ նպատակ ունենալով զարգացնել մանկավարժների մասնագիտական կարողությունները և աջակցել ժամանակակից կրթական գործիքների արդյունավետ կիրառմանը դասավանդման գործընթացում:... 26.10.2026 Երևանում շարունակվում են ԲՏՃՄ առարկաների ուսուցիչների վերապատրաստումները Ժամանակակից լաբորատորիաներ, գործնական ուսուցում և նոր մեթոդական մոտեցումներ․ Երևանում շարունակվում են ԲՏՃՄ առարկաների ուսուցիչների վերապատրաստումները՝ նպատակ ունենալով ապահովել դպրոցներում ներդրվող լաբորատոր սարքավորումների արդյունավետ կիրառումը և նպաստել ուսուցման որակի բարձրացմանը։ ՀՀ հանրակրթական ուսումնական հաստատություններում շարունակվում է ԲՏՃՄ և ՏՀՏ ուղղություններով ժամանակակից ինժեներական լաբորատորիաների ներդրման գործընթացը։ Դպրոցներում ստեղծվող նոր հնարավորությունները լիարժեք... 23.10.2026 Երևանում շարունակվում են ԲՏՃՄ առարկաների ուսուցիչների մասնագիտական վերապատրաստումները Գործնական հմտությունների զարգացում, հետազոտահեն ուսուցում և ժամանակակից կրթական մեթոդներ․ Երևանում շարունակվում է ԲՏՃՄ առարկաների դասավանդման արդիականացմանն ուղղված վերապատրաստումների հերթական փուլը: Հոկտեմբերի 19-ին Երևանում մեկնարկել է բնագիտական, տեխնոլոգիական, ճարտարագիտական և մաթեմատիկական (ԲՏՃՄ) առարկաներ դասավանդող ուսուցիչների վերապատրաստումների հերթական փուլը։ Դասընթացներն անցկացվում են Երևանի թիվ 122 հիմնական և Երևանի Արտաշես Շահինյանի անվան ֆիզիկամաթեմատիկական մասնագիտացված...