Նորություններ
Նախակրթարաններ ՀՀ Արարատի մարզի 9 համայնքներում
16.11.2017
Նոյեմբերի 5-ին «Կրթության բարելավում» ծրագրի շրջանակներում իրականացվող աշխատանքների համատեքստում աշխատանքային այցով ՀՀ Արարատի մարզի համայնքներում էին ԿԾԿ ԾԻԳ-ի «Դպրոցի երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում» ենթաբաղադրիչի ղեկավար Ա Խաչատրյանը և շինարար խորհրդատու Վ. Բոյաջյանը: Աշխատանքային այցի նպատակը վերոնշյալ մարզի 9 համանյքներում իրականացվող միկրոծրագրերի մշտադիտարկումն էր: Հավելենք, որ ՀՀ Արարատի մարզի 9 համայնքների կրթական հաստատություններում ամփոփվում է իրականացվող միկրոծրագրերի երկրորդ փուլը և հոկտեմբերի 1-ից այդ համայնքների կրթօջախներում գործում են նորաստեղծ նախակրթարանները: Նախակրթարանների ստեղծման մեկնարկը տրվել է հինգ ամիս առաջ , սակայն համայնքներում արդեն ավարտվել են վերանորոգման, համապատասխան տարածքների բարեկարգման, գույքով համալրման աշխատանքները, իրականացվել է անհրաժեշտ գրականության, ուսումնական նյութերի, գրենական պարագաների, խաղալիքների ձեռքբերումը, ինչպես նաև դաստիարակների վերապատրաստումը Կրթության ազգային ինստիտուտի կողմից: ՀՀ Արարատի մարզի Ղուկասավանի միջնակարգ դպրոցի տնօրեն Ռուզաննա Ահարոնյանը նշում է, թե ընդամենը կես տարի առաջ ներկայիս նախակրթարանի տարածքը անմխիթար վիճակում էր և նախակրթարան ունենալը միայն երազանք էր:
Ղուկասավանի նախակրթարանի սաները ԾԻԳ ներկայացուցիչներին ոգևորությամբ ցույց տվեցին նորաստեղծ նախակրթարանի լուսավոր սենյակներն ու գունագեղ պահարանները: Նրանք հիացած են նոր խաղային անկյուններով ու հարմարավետ պայմաններով :
Վեդիի թիվ 2 հիմնական դպրոցի տնօրեն Նոնա Անդրեասյանի խոսքով՝ Վեդիում նախակրթարանին վաղուց էին սպասում. <<Այս նախակրթարանի ստեղծումը մեծ ձեռքբերում է բոլորի համար. այն որքան ներկայի, այնքան էլ ապագայի համար է>>,- փաստում է դպրոցի տնօրենը: Անհրաժեշտ գույքով և միջոցներով ապահովված այս շինությունը սպասված նվեր է նաև Սիփանիկ համայնքի համար: Այս հարմարավետ նախակրթարանում դեռ շատ ու շատ սիփանիկցիներ են կրթվելու՝ վստահեցնում են համայնքի բնակիչները: ՀՀ Արարատի մարզի 9 համայնքներում նորաստեղծ նախակրթարանները սպասված են և կնպաստեն գյուղական համայքների բարեկեցության բարձրացմանը:
Հավելենք, որ ներկայումս իրականացման փուլում են միկրոծրագրերը ՀՀ Գեղարքունիքի մարզի 3 համայնքներում:
