Նորություններ
Հեռավար ուսուցման լաբորատորիա՝ Հյուսիսային համալսարանի ՀՀ Լոռու մարզի Ալավերդու մասնաճյուղում
27.10.2017
Հոկտեմբերի 20-ին աշխատանքային այցով Հյուսիսային համալսարանի` ՀՀ Լոռու մարզի Ալավերդու մասնաճյուղում էին ԿԾԿ ԾԻԳ-ի ներկայացուցիչները: Միջանկյալ այցի նպատակը Հայաստանի բարձրագույն կրթության Նորարարությունների մրցակցային հիմնադրամի (ՆՄՀ) դրամաշնորհային ընթացիկ ծրագրի մշտադիտարկումն էր: Այցի ընթացքում ներկաները ծանոթացան ՆՄՀ շրջանակներում <<Հեռակա ուսուցման դասընթացների կազմակերպում՝ հեռավար կրթական տեխնոլոգիաների զուգորդմամբ>> դրամաշնորհային ծրագրի ընթացիկ աշխատանքներին: Նշենք, որ դրամաշնորհային ծրագրի իրականացումը մեկնարկել է 2017 թվականի հունվարին և միտված է Լոռու մարզում բարձրագույն մասնագիտական կրթության հասանելիության ապահովմանը՝ հեռավար կրթության զարգացման և տեղեկատվական հաղորդակցական տեխնոլոգիաների (ՏՀՏ) կիրառման միջոցով: Այդ շրջանակներում նախատեսված էր ստեղծել հեռավար ուսուցման լաբորատորիա Հյուսիսային համալսարանի` ՀՀ Լոռու մարզի Ալավերդու <<Թումանյան>> մասնաճյուղում, որտեղ կրթական ծառայությունների մատուցման համակարգումը իրականացվելու է Հյուսիսային համալսարանի Երևանի կրթահամալիրում տեղակայված հեռավար ուսուցման կենտրոնական լաբորատորիայի կողմից: Հանդիպման ընթացքում քննարկվեցին դրամաշնորհային ծրագրով նախատեսված հետագա աշխատանքների և գործընթացների կազմակերպմանն առնչվող հարցեր: Նշենք, որ սույն թվականի դեկտեմբերին ավարտվում է դրամաշնորհային ծրագրի երկրորդ փուլը: Կատարված մշտադիտարկման ընթացքում ներկաները ամրագրեցին, որ Ալավերդու մասնաճյուղում ավարտվել են կրթական տարածքի վերանորոգման աշխատանքները: Ձեռք բերված անհրաժեշտ կահույքն արդեն տեղադրված է: Իրականացվել է նաև տեխնիկական վերազինումը: Հյուսիսային համալսարանի` ՀՀ Լոռու մարզի Ալավերդու <<Թումանյան>> մասնաճյուղի տնօրենի խոսքերով. ծրագիրը մեծ աջակցություն է ինչպես Ալավերդի համայնքի, այնպես էլ շրջակա գյուղական բնակավայրերի այն երիտասարդների համար, ովքեր ունեն բարձրագույն կրթություն ստանալու ցանկություն, սակայն այդ կրթությունը ստանալու հնարավորությունների հարցում սահմանափակված են: Հյուսիսային համալսարանի` ՀՀ Լոռու մարզի Ալավերդու <<Թումանյան>> մասնաճյուղը, լինելով այդ տարածաշրջանում բարձրագույն կրթության ծառայություն մատուցող միակ հաստատությունը, առավել ևս պարտավորված է իրականացնել բարձրորակ կրթություն, ինչի հնարավորությունները ՆՄՀ դրամաշնորհային ծրագրի իրականացմամբ կընդլայնվեն:
