Նորություններ
ԵՊՀ-ն շարունակում է նորարարական ծրագրերի իրականացումը
08.06.2017
Հունիսի 8-ին Հայաստանի բարձրագույն կրթության Նորարարությունների մրցակցային հիմնադրամի շրջանակներում մեկնարկեց առաջին շրջափուլով իրականացվող դրամաշնորհային ծրագրերի մեկշաբաթյա մշտադիտարկումը բուհերում: Առաջին հանդիպումը տեղի ունեցավ Երևանի պետական համալսարանում (ԵՊՀ): Մշտադիտարկումն իրականացնում էին ՀՀ կրթության և գիտության նախարարության և ԿԾԿ ԾԻԳ-ի ներկայացուցիչները: Ներկաները ԵՊՀ դրամաշնորհային ծրագրի համակարգող Կարեն Թռչունյանի ուղեկցությամբ եղան ԵՊՀ կենսաբանության ֆակուլտետում և ծանոթացան ՆՄՀ շրջանակներում հիմնվող <<Մանրէաբանական կենսատեխնոլոգիաների և կենսավառելիքի նորարարական կենտրոնի>> ստեղծման ընթացիկ աշխատանքներին: Կենտրոնի ստեղծումն իրականացվում է դրամաշնորհային ծրագրով սահմանված փուլերի համաձայն: Ծրագրի մեկնարկից մեկ ու կես տարի անց արդեն ամփոփվում է դրամաշնորհային ծրագրի երրորդ փուլը: Նշենք, որ կենտրոնի ստեղծումը կնպաստի ոլորտի հիմնարար և կիրառական հետազոտությունների արդիակացմանը, գարեջրի, կաթնամթերքի, գինու և այլ արտադրություններում նոր մանրէաբանական տեխնոլոգիաների մշակմանն ու ներդրմանը, օրգանական թափոններից կենսավառելիքի ստացման նոր տեխնոլոգիայի մշակմանը: Ներկաներն ամրագրեցին, որ ձեռք բերված լաբորատոր սարքավորումներն ու քիմիական նյութերի մի մասն արդեն իսկ մատակարարվել են, տեղադրված են դրանց համար հատկացված վերանորոգված տարածքում: Հիշեցնենք, որ կենտրոնի հիմնադրումը, վերանորոգումն ու տեխնիկական զինումը ավարտվել է դրամաշնորհային ծրագրի նախորդ փուլերում: Ավարտվել են մասնագիտական կրթական ծրագրերի վերանայման աշխատանքները, իրականացվել է միջազգային չափանիշներին համապատասխան, նորացված մագիստրոսական ծրագրի մշակում: Առաջիկայում նախատեսվում է այդ նորագույն մանրէաբանական սարքավորումների կիրառում մագիստրոսական ու ասպիրանտական գիտահետազոտական աշխատանքներում: Բուհն արդեն իսկ քննարկում է հնարավոր համագործակցության ծրագրեր տեղական և արտասահմանյան մի շարք կազմակերպությունների հետ, առկա են նաև համագործակցության շուրջ նախնական համաձայնություններ, ինչպես օրինակ Բելգորոդի համալսարանի հետ: Այցի ընթացքում ԿԾԿ ԾԻԳ-ի ներկայացուցիչները Կ.Թռչունյանի հետ համատեղ քննարկեցին դրամաշնորհային պայմանագրի մաս կազմող մոնիտորինգային պլանի ցուցիչների համապատասխանությունը իրականացված աշխատանքներին, ինչպես նաև անհրաժեշտ լաբորատոր սարքավորումների շահագործման և պահպանման հետ կապված մի շարք հարցեր: Դրամաշնորհային ծրագրի համակարգողը ներկայացրեց նաև, կոնսորցիումի գործընկերների հետ համագործակցության ընթացքը: Այս համագործակցությունը նպաստում է որակյալ մասնագետների ներհոսքին դեպի արտադրություն: Կ. Թռչունյանը՝ կարևորելով համատեղ աշխատանքները, տեղեկացրեց, որ նախատեսվում է կոնսորցիումի գործընկերների հետ համատեղ լաբորատոր ձեռնարկի մշակում և հրատարակում: Հավելենք, որ ԵՊՀ-ում <<Մանրէաբանական կենսատեխնոլոգիաների և կենսավառելիքի նորարարական կենտրոնի>> ստեղծումը թույլ կտա ոչ միայն բարձր մակարդակով իրականացնել մագիստրոսական ու ասպիրանտական գիտահետազոտական աշխատանքներ, այլև կնպաստի ձեռնարկատիրական գործունեություն ծավալմանը:
