Կրթական ծրագրերի կենտրոն Կրթության, գիտության, մշակույթի և սպորտի նախարարություն

Դեկտեմբերի 7-ից ԵՊՀ-ում մեկնարկել է Հայաստանի գիտական համայնքի «Ամենամյա ամփոփիչ գիտաժողովը», որը ամփոփվելու է դեկտեմբերի 15-ին Ծաղկաձորում:
Գիտաժողովի նպատակն է խթանել գիտության զարգացումը, ամրապնդել միջգիտակարգային կապերը և ներկայացնել գիտական նոր ձեռքբերումները: Սա բացառիկ հնարավորություն է գիտնականների համար միասին քննարկելու նոր գաղափարներ, խթանելու գիտական ոլորտի զարգացումը և ընդլայնելու համագործակցության սահմանները:
Գիտության զարգացմանն միտված այս կարևոր միջոցառմանը իր ակտիվ մասնակցությունն ունի Ֆոտոնիկայի և արհեստական բանականության լաբորատորիան, որն ստեղծվում է Համաշխարհային բանկի համաֆինանսավորմամբ ու «Կրթական ծրագրերի կենտրոն» ԾԻԳ-ի աջակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի «Օպտիկական միկրոհամակարգերի մշակման և հետազոտման գիտակրթական կենտրոնի ստեղծում» ՆՄՀ դրամաշնորհային ծրագրի շրջանակում: Ամենամյա ամփոփիչ գիտաժողովի ընթացքում «Օպտիկական միկրոհամակարգերի մշակման և հետազոտման գիտակրթական կենտրոնի ստեղծում» ծրագրի ղեկավար Մուշեղ Ռաֆայելյանը հանդես է եկել զեկուցմամբ և ներկայացրել ստեղծվող Օպտիկական միկրոհամակարգերի կենտրոնի հնարավորությունները, «Օպտիկա և ֆոտոնիկա» նոր մագիստրոսական ծրագրի առավելությունները, կիսվել գիտական համայնքի հետ կենտրոնի տեսլականով և խոսել գիտաժողովի կարևոր նշանակության մասին:
Ծրագրի ղեկավարի հավստմամբ, գիտաուսումնական կենտրոնը համալրված է լինելու ժամանակակից օպտիկական և օպտոէլեկտրոնային սարքերի միկրոմշակման, դրանց միջոցով կենսաօպտիկայի, տեղեկատվության մշակման ու հեռահաղորդակցության ոլորտներում բարձր տեխնոլոգիական միկրոհամակարգերի պատրաստման համար անհրաժեշտ նյութատեխնիկական բազայով և նպաստելու է կրթության ու հետազոտությունների արդյունավետության բարձրացմանը։ Մ. Ռաֆայելյանը փաստել է նաև, որ ծրագրի նպատակներից է ամբողջ աշխարհի գիտնականների համար ստեղծել հարթակ՝ ներկայացնելու օպտիկայի և ֆոտոնիկայի բնագավառում վերջին հետազոտությունների արդյունքները։
«Ամենամյա ամփոփիչ գիտաժողովի» մասին տեսանյութը ՝հասանելի է վերոնշյալ հղմամբ՝ https://www.youtube.com/watch?v=Nn6jrXK6D7g