Նորություններ
Համաշխարհային բանկի թիմը Կրթական ծրագրերի կենտրոնի աշխատակիցների հետ այցեր է իրականացրել ՀՀ մարզերում
21.02.2024
Փետրվարի 20-ին Համաշխարհային բանկի թիմը Կրթական ծրագրերի կենտրոնի աշխատակիցների ուղեկցությամբ այցելել է ՀՀ Արարատի մարզի Հովտաշեն և Դեղձուտ համայնքների կրթական հաստատություններ: Այցերի համատեքստում ՀԲ-ի կողմից ֆինանսավորվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակներում իրականացված և ընթացիկ աշխատանքների դիտարկումն էր: Առաքելության կազմում էին Առաջադրանքի թիմի համաղեկավար, Շիզուկա Կոնիմոտոն, ՀԲ խորհրդատու Աննա Մալխասյանը, ծրագրերի ավագ պատասխանատու Նարինե Թադևոսյանը, ինչպես նաև ՀՀ ԿԳՄՍՆ ԿԾԿ ԾԻԳ ծրագրերի ղեկավար Արմինե Խաչատրյանը, ‹‹Հանրակրթական դպրոցների վերազինում›› ենթաբաղադրիչի ղեկավար Մհեր Մելիք-Բախշյանը: ՀԲ պատվիրակությունը աշխատանքային այցը մեկնարկեց Հովտաշենի միջնակարգ դպրոցից, որտեղ ՀԲ ներկայացուցիչների դիտարկման տիրույթում էր նորաստեղծ նախակրթարանը: ՀԲ պատվիրակությունը, ԿԾԿ ԾԻԳ-ի տնօրենի տեղակալ/ծրագրերի ղեկավար Արմինե Խաչատրյանի ուղեկցությամբ շրջեց նախակրթարանում, ծանոթացավ կատարված աշխատանքներին, զրուցեց մանկավարժների հետ: ՀԲ պատվիրակության հաջորդ կանգառը Դեղձուտի միջնակարգ դպրոցն էր, որտեղ հյուրերի դիտարկման տիրույթում էին տեղեկատվական տեխնոլոգիաների ( ինֆորմատիկա) և բնագիտական առարկաների (ֆիզիկա, քիմիա, աշխարհագրություն և կենսաբանություն) գծով լաբորատորիաները: ՀԲ թիմը դիտարկեց ընթացիկ աշխատանքներն ըստ ժամանակացույցի, ծանոթացավ լաբորատորիաների ստեղծման ողջ գործընթացին: Հյուրերը տպավորված էին ստեղծված պայմաններով: ՀԲ պատվիրակության հաջորդ կանգառը Արտաշատի ավագ դպրոցն էր , որը ‹‹Կրթության բարելավման ծրագրի լրացուցիչ ֆինանսավորում» վարկային ծրագրում ընդգրկված 4 ավագ դպրոցներից մեկն է, որտեղ արդեն մեկնարկել են հիմնանորոգման աշխատանքները: Պատվիրակությունը դիտարկեց ընթացող շինարարական աշխատանքները: ՀԲ պատվիրակության այցերը ՀՀ մարզեր կշարունակվեն նաև փետրվարի 21-ին :
