Կրթական ծրագրերի կենտրոն Կրթության, գիտության, մշակույթի և սպորտի նախարարություն

Հունվարի 18-ին աշխատանքային այցով Ճարտարապետության և շինարարության Հայաստանի ազգային համալսարանում (ՃՇՀԱՀ) էին ՀՀ ԿԳՄՍ նախարարության և ԿԾԿ ԾԻԳ-ի ներկայացուցիչները: Այցի նպատակը Հայաստանի բարձրագույն կրթության Նորարարությունների մրցակցային հիմնադրամի (ՆՄՀ) դրամաշնորհային ընթացիկ ծրագրի մշտադիտարկումն էր: ՀՀ ԿԳՄՍ նախարարության և «Կրթական ծրագրերի կենտրոն» ԾԻԳ-ի ներկայացուցիչները ՃՇՀԱՀ-ի դրամաշնորհային ծրագրի ղեկավար Ինժեներական գեոդեզիայի ամբիոնի դոցենտ, տ.գ.թ. Վարազդատ Հովհաննիսյանի և համակարգող Կրթության վարչության ղեկավար, Տեսական մեխանիկայի և նյութերի դիմադրության ամբիոնի դոցենտ, տ.գ.թ. Անգին Մարտիրոսյանի ուղեկցությամբ ծանոթացան ‹‹Ինժեներական համակարգերի մոդելավորման, նախագծման և կառավարման խելացի լուծումների ապահովումը և կրթական ծրագրերի արդյունավետության բարձրացումը՝ լաբորատոր փորձասարքերի համալրմամբ» ծրագրի շրջանակում հիմնվող ‹‹ՍՄԱՐԹԼԱԲ» կենտրոնի ստեղծման ընթացիկ աշխատանքներին: Ծրագրի իրականացումը մեկնարկել է 2023 թվականի հունիսին, և իրականացվում է Համաշխարհային բանկի համաֆինանսավորմամբ «Կրթության բարելավում ծրագրի լրացուցիչ ֆինանսավորում» վարկային ծրագրի շրջանակում: Նշենք, որ ՃՇՀԱՀ-ի դրամաշնորհային ծրագրի շրջանակում նախատեսվում է Ինժեներական համակարգերի մոդելավորման, նախագծման և կառավարման համապատասխան կրթական ծրագրերի դասավանդման-ուսումնառության կատարելագործմանը, գիտահետազոտական գործունեության զարգացմանը և առևտրայնացմանը, խելացի լուծումների կիրառմանը և բուհի ուսումնագիտական գործառույթների ընդլայնմանն ու կարողությունների հզորացմանը միտված առկա լաբորատոր բազայի համալրում միջառարկայական կիրառություն ունեցող նորագույն փորձասարքերով: Ծրագրի արդյունքում նախատեսվում է իրականացնել Սարքերի ինտերնետ (IoT) լաբորատորիայի հիմնում,  առկա լաբորատորիաներում որոշ փորձասարքերի համար համապատասխան տարածքի առանձնացում և կահավորում, Համակարգչային լսարանի հիմնում՝ անհրաժեշտ ծրագրային փաթեթների ապահովմամբ, Շինությունների տեղեկատվական մոդելավորման (ՇՏՄ-BIM. Building Information Modeling) մոտեցումների ներդրում համալսարանի կրթական ծրագրերում, Կրթական ծրագրերի վերանայում և բարելավում, ուսումնամեթոդական նյութերի մշակում և տպագրում, տեղեկատվական միջոցառումների իրականացում` ԲՏՃՄ մասնագիտություների` մասնավորապես ինժեներական մասնագիտություների գրավչության բարձրացման ուղղությամբ: Նշենք, որ ‹‹ՍՄԱՐԹԼԱԲ»-ի ստեղծումն իրականացվում է դրամաշնորհային ծրագրով սահմանված գործողությունների պլանի համաձայն: Այցի ընթացքում ԿԾԿ ԾԻԳ-ի ներկայացուցիչները, ԿԳՄՍՆ Բարձրագույն կրթության և գիտության կոմիտեի ներկայացուցչի և բուհի ներկայացուցիչների հետ համատեղ քննարկեցին դրամաշնորհային ծրագրի ժամանակացույցով նախատեսված գործողությունները և դրանց իրականացման ընթացքը:
Դրամաշնորհային ծրագրի ղեկավարի ու համակարգողի ուղեկցությամբ մշտադիտարկման աշխատանքային խմբի անդամները եղան բուհում առանձնացված ‹‹ՍՄԱՐԹԼԱԲ» լաբորատորիայի տարածքում և լսարանում։ Դրամաշնորհային ծրագրի ղեկավարի հավաստմամբ իրականացվում են համակարգչային տեխնիկայի և լաբորատոր սարքավորումների ձեռբերման գործընթացները։ Համակարգչային սարքավորումների ձեռքբերման մրցույթը ամփոփման փուլում է, իսկ լաբորատոր սարքավորումների ձեռքբերման համար հայտարարվել է միջազգային մրցակցային գնման եղանակով մրցույթ, որն ընթացքի մեջ է։
Դրամաշնորհային ծրագրի համակարգող Անգին Մարտիրոսյանը տեղեկացրեց նաև, որ մեկնարկել են մասնագիտական կրթական ծրագրերի վերանայման աշխատանքները: Նա շեշտեց, որ ծրագրի արդյոնքում իրականացվելու է շինությունների տեղեկատվական մոդելավորման (ՇՏՄ-BIM. Building Information Modeling) մոտեցումների ներդրում համալսարանի կրթական ծրագրերում:
‹‹Կիրառելով BIM տեխնոլոգիաները՝ կստեղծվեն խելացի տվյալներ, որոնք կարող են օգտագործվել շենքի կամ ենթակառուցվածքների նախագծման, շինարարության և շահագործման ողջ ցիկլի ընթացքում, որն սկսվում է խելացի 3D մոդելի ստեղծումից և ապահովում է փաստաթղթերի կառավարում, համակարգում և մոդելավորում նախագծի ողջ կյանքի ընթացքում (պլանավորում, նախագծում, կառուցում, շահագործում և սպասարկում): Այս մոտեցումը թույլ կտա Հայաստանի Հանրապետության կարիքների համար իրականացնել նոր գիտահետազոտական մշակումներ››,- հավելեց ծրագրի համակարգողը:

Մշտադիտարկման աշխատանքային խմբի անդամներն նշեցին, որ դրամաշնորհային ծրագրի նպատակների և արդյունքների մասին իրազեկման միջոցառումները պետք է լինեն շարունակական, հնարավորիս մատչելի, առավել մանրամասն պետք է ներկայացնել դրամաշնորհային ծրագրի նպատակներն ու ակնկալվող արդյունքները, և այդ միջոցառումները պետք է ուղղված լինեն ԲՏՃՄ ոլորտի մասնագիտություների գրավչության բարձրացմանը՝ ապագա ուսանողների, այդ թվում իգական սեռի ապագա ուսանողների թվի ավելացմանը, ինչպես նաև հետազոտական, գիտական աշխատանքներում իգական սեռի ներկայացուցիչների ներգրավմանը: