Նորություններ
Հանրակրթական ուսումնական հաստատությունների ներկայացուցիչների վերապատրաստումները շարունակվում են
22.05.2020
Նոր կորոնավիրուսի համավարակի պայմաններում աշխարհն արտառոց իրավիճակում է հայտնվել։ Ստեղծված իրադրությունը մեծ մարտահրավեր է կրթական համակարգի համար։ Երկրում հայտարարված արտակարգ դրության պայմաններում կրթական հաստատությունները ստիպված են առցանց սկզբունքով ուսուցում իրականացնել՝ ապահովելու աշակերտների կրթության անընդհատությունը։ Ուսուցման առցանց իրականացումը ենթադրում է նոր մոտեցումներ և ՏՀՏ նոր գործիքներ: Կրթական ծրագրերի կենտրոնը հաշվի առնելով ստեղծված իրավիճակի մարտահրավերները շարունակում է իրականացնել հանրակրթական ուսումնական հաստատությունների ներկայացուցիչների վերապատրաստումներ` առարկաների դասավանդման ընթացքում ՏՀՏ գործիքների կիրառումը խթանելու նպատակով: Հասցեական վերապատրաստումների ժամանակացույցի հստակեցմանն ու շարունակական վերապատրաստումների կազմակերպմանն էր ուղղված «Կրթության համակարգում տվյալների հավաքագրման և առաջընթացի մշտադիտարկման բարելավում» ենթաբաղադրիչի կողմից մայիս 12-ին կազամակերպված Zoom հարթակում հեռավար ձևաչափով հանդիպումը: Հանդիպմանը մասնակցում էին կանադական հեղինակավոր Ագենս Յունիվերսարի Դե Լա Ֆրանկոֆոն կազմակերպության կողմից վերապատրաստված և միջազգային հավաստագիր ստացած 30 մանկավարժներ: Քննարկվեցին հասցեական վերապատրաստումների ժամանակացույցը և դրանց կազմակերպմանն առնչվող շատ հարցեր: Նշենք, որ հասցեական վերապատրաստումները ընթանում են մի քանի փուլերով՝ ընդգրկելով մայրաքաղաքն ու հանրապետության բոլոր մարզերը:Հնգօրյա վերապատրաստման դասընթացների արդյունքում մանկավարժները տիրապետում են ՏՀՏ նոր գործիքների, ծանոթանում հետաքրքիր մուլտիմեդիա նյութերի ստեղծման առանձնահատկություններին: Հավելենք , որ այս վերապատրաստումների արդյունքում այսօր https://heravar.armedu.am/ հեռավար ուսուցման համալիր էջում ներառված է ՏՀՏ վերապատրաստումների https://icttraining.armedu.am/ մուդլ հարթակը, որտեղ մեկտեղված են մեծ թվով դասընթացներ տարբեր առարկաներից: Դրանք պատրաստված են ՏՀՏ գործիքների օգնությամբ՝ ՏՀՏ վերապատրաստումներ անցած մանկավարժների կողմից: Դասընթացները ամենօրյա դիտարկման են ենթարկվում «Կրթական ծրագրերի կենտրոն» ԾԻԳ-ի կողմից, ֆիլտրվում են և յուրաքանչյյուր օր նորացվում :