Նորություններ
ՀՀ Արարատի մարզի Արտաշատի ավագ դպրոցում ամփոփվել են հիմնանորոգման աշխատանքները
14.01.2026
Հունվարի 14-ին «Կրթության բարելավման լրացուցիչ ֆինանսավորում» վարկային ծրագրի շրջանակներում իրականացվող աշխատանքների համատեքստում «Կրթական ծրագրերի կենտրոն» ԾԻԳ ներկայացուցիչները աշխատանքային այց են իրականացրել ՀՀ Արարատի մարզի Արտաշատի ավագ դպրոցում: Հիշեցնենք, որ վերոնշյալ ավագ դպրոցում ամփոփվել են սեյսմակայուն հիմնանորոգման շինաշխատանքները: Այցի նպատակը շինարարական աշխատանքների որակի ու տեմպի ամփոփիչ մշտադիտարկումն էր: «Կրթական ծրագրերի կենտրոն» ԾԻԳ-ի «Աջակցություն միջնակարգ դպրոցի երրորդ աստիճանի զարգացմանը» ենթաբաղադրիչի ներկայացուցիչները դիտարկեցին իրականացված աշխատանքները: Հանդիպման ընթացքում ներկաները ուսումնասիրեցին կատարված շինարարության որակը:ԿԾԿ ԾԻԳ-ի ներկայացուցիչները արձնագրեցին՝ կատարված են դպրոցի հարակից տարածքների բարեկարգման աշխատանքները: Ամփոփվել են սանհանգույցների սալիկապատման աշխատանքները: Կառուցվել են արտաքին և ներքին աստիճաններ ու թեքահարթակներ: Փաստենք, որ շենքի հիմքերի ուժեղացման և ամրացման մետաղական ցանցի և պատերի ջերմամկուսացման շերտի տեղադրման, տանիքի կառուցման աշխատանքները ամփոփվել էին սեպտեմբերին: Նշենք, որ «Կրթության բարելավման լրացուցիչ ֆինանսավորում» վարկային ծրագրի շրջանակներում այստեղ ստեղծվել են ժամանակակից ռեսուրսներով կահավորված բնագիտական առարկաների գծով լաբորատորիաներ: Այստեղ երեխաների համար ստեղծված են էապես նոր հնարավորություններ, նրանք իսկապես ունեն ստեղծագործելու, իրենց բոլոր նախասիրությունները զարգացնելու, որակյալ կրթություն ստանալու անհրաժեշտ պայմաններ: Հիմնանորոգված դպրոցն ունի հանդիսությունների դահլիճ, մեծ սպորտային դահլիճ, բացօթյա մարզադաշտ, հագեցած է լաբորատորիաներով և այլ անհրաժեշտ ուսումնական ենթակառուցվածքներով: Նորակառույց դպրոցը շահագործման է հանձնվել 2025թ. դեկտեմբերին: Նշենք, որ «Կրթության բարելավման լրացուցիչ ֆինանսավորում» վարկային ծրագրի շրջանակներում` ամփոփվում են թվով երեք ավագ դպրոցների հիմնանորոգման աշխատանքները:
