Կրթական ծրագրերի կենտրոն Կրթության, գիտության, մշակույթի և սպորտի նախարարություն

Ֆոտոնիկայի և արհեստական բանականության լաբորատորիան շարունակում է ընդլայնել իր գիտական և տեխնոլոգիական հնարավորությունները: Նշենք , որ վերոնշյալ ենթակառուցվածքը ստեղծվել է Համաշխարհային բանկի համաֆինանսավորմամբ, Կրթական ծրագրերի կենտրոն ԾԻԳ-ի աջակցությամբ իրականացվող ‹‹Օպտիկական միկրոհամակարգերի մշակման և հետազոտման գիտակրթական կենտրոն›› դրամաշնորհային ծրագրի շրջանակում: Ֆոտոնիկայի և արհեստական բանականության լաբորատորիան հուլիսի 4-ին մեկնարկել է հետաքրքիր և արդյունավետ համագործակցություն Leica Microsystems-ի և վերջինիս ներկայացուցիչ Գեո-Նալ ընկերության հետ, որի շրջանակում լաբորատորիայում կայացավ երկօրյա միջոցառում՝ ներառյալ վերապատրաստման դասընթաց լաբորատորիայի թիմի համար և բաց հանրամատչելի սեմինար՝ ոլորտի մասնագետների և ուսանողների մասնակցությամբ: Հիշեցնենք, որ Ֆոտոնիկայի և արհեստական բանականության լաբորատորիան ‹‹Օպտիկական միկրոհամակարգերի մշակման և հետազոտման գիտակրթական կենտրոն›› դրամաշնորհային ծրագրի շրջանակում համալրվել էր նորագույն կոնֆոկալ ֆլյուորեսցենտային մանրադիտակով, որի գործարկման նպատակով Leica-ի առաջատար մասնագետները՝ Անդրեաս Ֆուլտերերն ու Նիկոդեմ Շիմանսկին, իրականացրեցին գործնական վերապատրաստում։ Թրեյնինգի ընթացքում լաբորատորիայի թիմը աշխատեց նոր սարքի հետ՝ ուսումնասիրելով հեղուկ բյուրեղային նմուշ և դրա մեջ առաջացած դեֆեկտների չափերը՝ իրական ժամանակում:
Հուլիսի 25-ին կայացավ նաև բաց սեմինար, որին մասնակցեցին բազմաթիվ հետազոտողներ, ուսանողներ և ոլորտով հետաքրքրված անձինք: Սեմինարի ընթացքում ներկայացվեցին Leica-ի միկրոսկոպիկ լուծումները՝ ինչպես կենսաբանական, այնպես էլ նյութագիտության ուղղություններով, ուղեկցված գործնական ցուցադրություններով: Հավելենք` Ֆոտոնիկայի և արհեստական բանականության լաբորատորիայի արդյունավետ գործունեությունը փաստում է ծրագրի կայունության և շարունակականության մասին: