Կրթական ծրագրերի կենտրոն Կրթության, գիտության, մշակույթի և սպորտի նախարարություն

Երևանի պետական համալսարանի գիտական խորհրդի նիստերի դահլիճում մեկնարկեց «Հաշվետու գիտաժողով-2025» գիտական միջոցառումը՝ արդեն ավանդական դարձած ձևաչափով միավորելով ԵՊՀ գիտական ներուժը։ Գիտաժողովը նպատակ ունի ամփոփելու տարբեր ստորաբաժանումների գիտական գործունեությունն ու ապագա ծրագրերը:
ԵՊՀ ռեկտոր Հովհաննես Հովհաննիսյանը, կարևորելով այս գիտական միջոցառման անցկացումը, ասաց. «Արդեն երկրորդ տարին է, ինչ կազմակերպվում է այս գիտաժողովը՝ հրաշալի հնարավորություն ընձեռելով քննարկելու ԵՊՀ գիտակրթական կենտրոնների, ինստիտուտների և լաբորատորիաների կատարած աշխատանքներն ու արձանագրած արդյունքները››։
«Հաշվետու գիտաժողով-2025»-ի շրջանակում, Օպտիկական միկրոհամակարգերի կենտրոնի գիտաշխատողներ Տաթևիկ Սարուխանյանը և Վահրամ Գրիգորյանը ներկայացրեցին կենտրոնում կատարած իրենց ընթացիկ հետազոտությունները:
Տաթևիկ Սարուխանյանը ներկայացրեց երկֆոտոն պոլիմերացման վրա հիմնված իր աշխատանքը, որը վերաբերում է մոտ 200 նանոմետր կառուցվածքների ստեղծմանը։ Այս մոտեցումը կարող է կիրառվել միկրոչիպերի ու նանոմաշտաբ սարքերի նախագծման մեջ։
Վահրամ Գրիգորյանը խոսեց Բրեգի անդրադարձման միջոցով լույսի կառավարման հնարավորությունների մասին՝ ցուցադրելով, թե ինչպես կարելի է օպտիկական համակարգերում հասնել ճշգրիտ վերահսկման։
‹‹Մենք շարունակում ենք աշխատել նոր տեխնոլոգիական լուծումների ուղղությամբ››,- հավելեց Վահրամ Գրիգորյանը
Հիշեցնենք, որ Օպտիկական միկրոհամակարգերի կենտրոնը ստեղծվում է Համաշխարհային բանկի համաֆինանսավորմամբ ու «Կրթական ծրագրերի կենտրոն» ԾԻԳ-ի աջակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում։
«Հաշվետու գիտաժողով-2025» գիտական միջոցառումը կշարունակվի ս.թ. մայիսի 12-ին, 13-ին ու 14-ին և կամփոփի ԵՊՀ գիտական ստորաբաժանումների գործունեությունը՝ հնարավորություն ընձեռելով ոլորտի առաջատար գիտնականներին և հետազոտողներին ներկայացնելու իրենց գիտական հետազոտությունների արդյունքները, գործունեության ուղղություններն ու տեսլականը: