Կրթական ծրագրերի կենտրոն Կրթության, գիտության, մշակույթի և սպորտի նախարարություն

Նոյեմբերի 12-ին «Դպրոցին երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում» ենթաբաղադրիչի դրամաշնորհների համակարգող Լիաննա Շառոյանը և Ճարտարապետ-խորհրդատու Վռամ Բոյաջյանը այցելեցին ՀՀ Լոռու մարզի Վանաձորի թիվ 2, Սպիտակի թիվ 1 և ՀՀ Տավուշի մարզի Դիլիջանի թիվ 2 հիմնական դպրոցներ, որտեղ սեպտեմբերի 1-ին պաշտոնապես բացվել էին ‹‹Կրթության բարելավման ծրագրի լրացուցիչ ֆինանսավորում›› վարկային ծրագրի շրջանակում հիմնված նորաստեղծ նախակրթարանները: Այցի նպատակը վերոնշյալ կրթօջախներում միկրոծրագրերի շրջանակներում ստեղծված նախակրթարանների գործունեությանը ծանոթանալն էր: Առաջին կանգառը Վանաձորի թիվ 2 հիմնական դպրոցն էր , որտեղ ԿԾԿ ԾԻԳ-ի աշխատակիցները մասնակցեցին նախակրթարանի սաների փոքրիկ ցերեկույթին: ԿԾԿ ԾԻԳ-ի աշխատակիցները նախակրթարանի տնօրենի ուղեկցությամբ շրջեցին խմբասենյակներով, եղան նախակրթարանի բակում: Տնօրենը ներկայացրեց նախակրթարանի ստեղծման ընթացքը, խոսեց հաղթահարված դժվարությունների ու առաջիկա անելիքների մասին: Նշենք, որ 20 երեխայի համար նախատեսված նախակրթարանը ծրագրի իրականացման արդյունքում կահավորվել է համապատասխան ժամանակակից գույքով, սարքավորումներով, ապահովվել է մանկական գրականությամբ, ուսումնական նյութերով ու խաղալիքներով: Իրականացվել է նաև դաստիարակների վերապատրաստում: Նախակրթարանն ունի նաև հարմարեցված միջավայր:ԿԾԿ ԾԻԳ-ի աշխատակիցները եղան նաև Սպիտակի թիվ 1 և Դիլիջանի թիվ 2 հիմնական դպրոցներում, որտեղ ևս սեպտեմբերի 1-ից գործում են նորաստեղծ նախակրթարանները:
Հավելենք, որ այս տարի արդեն իսկ հիմնվել են 20 նախակրթարաններ ՀՀ մարզերում և Երևանում :