Կրթական ծրագրերի կենտրոն Կրթության, գիտության, մշակույթի և սպորտի նախարարություն

Արմավիրի մարզի Մեծամորի թիվ 1 հիմնական և Տանձուտի միջնակարգ դպրոցներում տեղի է ունեցել նախակրթարանների բացումը, որոնք ստեղծվել են «Կրթական ծրագրերի կենտրոն» ԾԻԳ-ի և վերոնշյալ կրթական հաստատությունների միջև կնքված դրամաշնորհային պայմանագրերով «Կրթության բարելավում» վարկային ծրագրի շրջանակներում: Հիշեցնենք որ սույն թվականի Հունիսի 29-ին ՀՀ կրթության և գիտության նախարարության Կրթական ծրագրերի կենտրոնում «Կրթության բարելավում» ծրագրի շրջանակներում դրամաշնորհային պայմանագրեր կնքվեցին ՀՀ Տավուշի մարզի 7, Լոռու մարզի 6, Արմավիրի մարզի 12 ուսումնական հաստատությունների հետ: Դրամաշնորհային պայմանագրերի կնքմանը հաջորդեց վերանորոգման աշխատանքները: Դրամաշնորհային պայմանագրերի կնքումից 3 ամիս անց միկրոծրագրերն արդեն կյանքի էին կոչվել: Ըստ պայմանագրերի միկրոծրագրերի ընդհանուր արժեքի շուրջ 75 տոկոսը կազմում է դրամաշնորհի գումարը, իսկ մնացած 25 տոկոսը` համայնքի և ծնողական ներդրումները: Նախակրթարանների բացմանը ներկա էին ՀՀ Արմավիրի մարզպետ Աշոտ Ղահրամանյանը, Մեծամորի քաղաքապետ Ռոբերտ Գրիգորյանը, մարզպետարանի աշխատակազմի կրթության, մշակույթի և սպորտի վարչության պետ Գայանե Սայադյանը, կրթական ոլորտը ներկայացնող մեծ թվով հյուրեր:
Արմավիրի մարզի կրթօջախներում միջոցառման մասնակիցներին դիմավորեցին տոնական բարձր տրամադրությամբ, երգ ու պարով, աղ ու հացով:
Նախակրթարանի բացումը, Մեծամորի թիվ 1 հիմնական դպրոցի տնօրեն Նունե Գևորգյանի խոսքով, երկար և շատ սպասված ձեռնարկ էր և՝ համայնքի, և՝ կրթօջախի համար: Տնօրենի տեղեկացմամբ` նախակրթարանը կգործի շուրջտարյա: Այսօր արդեն նախակրթարանն ունի 4-6 տարեկան 75 երեխա, որոնց թիվն ամեն օր ավելանում է: «Նախադպրոցական տարիքի երեխան հմուտ մասնագետների շնորհիվ այստեղ կստանա անհրաժեշտ գիտելիքներ, և կապահովվի նրա սահուն անցումը դպրոց»,- իր խոսքում ընդգծեց Նունե Գևորգյանը:
Ողջունելով միջոցառումների մասնակիցներին և շնորհավորելով բոլորին ` մարզպետ Աշոտ Ղահրամանյանը կարևորեց դպրոցներում իրականացված ծրագրերի նշանակությունը սաների հետագա կրթության և դաստիարակության գործում` վստահեցնելով, որ հաճելի պայմանները բարձրանում են ուսումնական գործընթացի արդյունավետությունը և որակը:
Հիշեցնենք, որ <<Դպրոցին երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում>> ենթածրագիրը նպատակաուղղված է նախադպրոցական տարիքի երեխաների կարողությունների և հմտությունների զարգացմանը նպաստելուն, որն իրականացվում է այլընտրանքային և քիչ ծախսատար կրթական ծառայությունների ներդրման միջոցով: