Նորություններ
Մոնիտորինգային այց ՀՀ Արմավիրի մարզում
08.12.2020
Դեկտեմբերի 3–ին ՀՀ ԿԳՄՍՆ «Կրթական ծրագրերի կենտրոն» ԾԻԳ-ի «Դպրոցին երեխաների պատրաստվածության մակարդակի բարձրացում և կրթության հավասար մեկնարկային հնարավորությունների ապահովում» ենթաբաղադրիչի համակարգող Ռուզաննա Խաչատրյանը այցելեց ՀՀ Արմավիրի մարզի միջնակարգ դպրոցներ: Ընդհանուր առմամբ, այս ուսումնական տարի ՀՀ Արմավիրի մարզում բացվել է 5 նախակրթարան՝ Արաքսի , Նոր Ամասիայի, Դաշտի, Այգևանի, Բագարանի, Խանջյանի միջնակարգ դպրոցներում։
Նշենք, որ նախակրթարանները ստեղծվել են Համաշխարհային բանկի համաֆինանսավորմամբ «Կրթության բարելավում» վարկային ծրագրի շրջանակներում: Դրանք գործում են 2020թ.-ի սեպտեմբերի մեկից: ԿԾԿ ԾԻԳ-ի ներկայացուցչի առաջին կանգառը Խանջյանի միջնակարգ դպրոցում էր: Ռ. Խաչատրյանը նախակրթարանի տնօրենի ուղեկցությամբ շրջեց խմբասենյակներով, եղավ նաև նախակրթարանի բակում: Տնօրենը կարևորեց դպրոցում իրականացված ծրագրի նշանակությունը սաների կրթության և դաստիարակության գործում` վստահեցնելով, որ դրամաշնորհային ծրագրի իրականացման արդյունքում ստեղծված պայմաններում ուսումնական գործընթացի արդյունավետությունը և որակը զգալիորեն բարձրացել է: Տնօրենի հավաստմամբ՝ համայնքի բնակիչները կարևորում են նախակրթարանի դերը համայնքում, ընդգծում, որ մեծ ուրախություն է այն, որ իրենց երեխաներն հնարավորություն ունեն կրթություն ստանալու հարմարավետ ու գեղեցիկ պայմաններում: Ռ. Խաչատրյանը այցն ամփոփեց Արաքսի միջնակարգ դպրոցում, որտեղ իրականացված միկրոծրագրի արդյունքում գործում է գեղեցիկ ու գունագեղ սենյակներով, հարմարավետ պահարաններով ու խաղալիքներով լի անկյուններով նախակրթարանը։
Նշենք նաև, որ «Կրթության բարելավում» վարկային ծրագրի շրջանակներում ստեղծված բոլոր նախակրթարաններում պահպանվել են ներառական կրթության կազմակերպման բոլոր պահանջները և նախակրթարաններն ունեն հարմարեցված պայմաններ և նախակրթարաններում կրթություն են ստանում նաև սահմանափակ հնարավորություններով երեխաներ:
Հիշեցնենք, որ «Կրթության բարելավում» վարկային ծրագրի շրջանակներում մայրաքաղաքում և ՀՀ մարզերում արդեն իսկ հիմնվել է 136 նախակրթարան։
