Նորություններ
Կենսաբանության ֆակուլտետն ընդլայնում է միջազգային կապերը
07.11.2017
Հոկտեմբերի 18-19-ը ԵՊՀ այցելեցին Գրոնինգենի կիրառական գիտությունների Հենզի համալսարանի (Նիդերլանդներ) պատվիրության անդամները: Երկօրյա այցելության շրջանակում պատվիրակության անդամներին նախ ընդունեց Կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի վարիչ Արմեն Թռչունյանը, որից հետո արտասահմանցի գործընկերները հանդիպեցին ֆակուլտետի դեկան Էմիլ Գևորգյանի հետ: Էմիլ Գևորգյանը հակիրճ ներկայացրեց ԵՊՀ պատմությունը, կրթական համակարգը, ֆակուլտետի կառուցվածքն ու զարգացման միտումները:
Այնուհետև հյուրերն այցելեցին Կենսաբանության ֆակուլտետի մանրէաբանական կենսատեխնոլոգիաների և կենսավառելիքի նորարարական կենտրոն, շրջեցին լաբորատորիայում, ծանոթացան կենտրոնի աշխատանքներին: Կենտրոնի տնօրեն Կարեն Թռչունյանը և կենտրոնի աշխատակիցները ներկայացրին նորարարական կենտրոնում ու Մանրէաբանության և կենսատեխնոլոգիայի ամբիոնում իրականացվող գիտահետազոտական ծրագրերն ու գրանցված արդյունքները: «Ես տպավորված եմ Երևանի պետական համալսարանի, մասնավորապես Մանրէաբանության և կենսատեխնոլոգիայի ամբիոնի հնարավորություններով և իրականացրած աշխատանքներով: Կարծում եմ՝ մենք բավականին լուրջ նախադրյալներ ունենք ակտիվ և արդյունավետ համագործակցություն ծավալելու, համատեղ գիտահետազոտական աշխատանքներ, փոխանակման ծրագրեր և, ինչու ոչ, նաև կրկնակի դիպլոմով կրթական ծրագրեր մշակելու և իրագործելու համար»,- նշեց Հենզի համալսարանի բնական գիտությունների և տեխնոլոգիայի դպրոցի ղեկավար Վիկտորին Գրաֆ-Փեթերսը: Վիկտորին Գրաֆ-Փեթերսը շեշտեց նաև, որ հետաքրքրություն կա նաև Կենսաբանության ֆակուլտետի մանրէաբանական կենսատեխնոլոգիաների և կենսավառելիքի նորարարական կենտրոնի աշխատանքների հանդեպ, ուստի փոխգործակցությունը կընդգրկի նաև այդ ոլորտը: Պատվիրակության անդամներին ընդունեց նաև ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանը: Հանդիպման ընթացքում պրոռեկտորը խոսեց բուհի գիտական քաղաքականության առանձնահատկությունների մասին, իսկ Միջազգային համագործակցության վարչության պետ Ալեքսանդր Մարգարովն անդրադարձավ միջազգային քաղաքականությանը, իրականացվող ծրագրերին և արտասահմանյան բուհերի հետ փոխգործակցություններին: Քննարկումներից հետո բուհերի միջև համագործակցության հուշագիր կնքվեց: «Հենզի համալսարանը գիտության և արդյունաբերության արդյունավետ համադրման մեծ փորձ ունի, ուստի մենք հուսով ենք, որ համատեղ իրականացվող ծրագրերը դրական ազդեցություն կունենան նաև պետհամալսարանի համապատասխան ճյուղերի զարգացման ու նորարարությունների ներդրման գործընթացում»,- ընդգծեց Արմեն Թռչունյանը և հավելեց, որ կարվի հնարավոր ամեն ինչ, որպեսզի համագործակցությունը կյանքի կոչվի և դրական արդյունքներ տա: Երկօրյա այցի շրջանակում Նիդերլանդներից ժամանած հյուրերը հանդիպեցին նաև ուսանողների հետ, Կենսաբանության ֆակուլտետի ու մասնավորապես Մանրէաբանության և կենսատեխնոլոգիայի ամբիոնի ղեկավարության հետ քննարկեցին համագործակցության ոլորտներն ու հեռանկարները, ինչպես նաև այցելեցին ԵՊՀ պատմության թանգարան, Երևանի պատմամշակութային վայրեր և գիտահետազոտական մի շարք հաստատություններ: