Նորություններ
Տեղի ունեցավ ՆՄՀ դրամաշնորհային ծրագրի ամփոփիչ մշտադիտարկումը Հայաստանի ազգային ագրարային համալսարանում
16.01.2026
Հունվարի 14-ին աշխատանքային այցով Հայաստանի ազգային ագրարային համալսարանում (ՀԱԱՀ) էին «Կրթական ծրագրերի կենտրոն›› ԾԻԳ-ի ներկայացուցիչները: Հանդիպմանը մասնակցում էին նաև ՀՀ կրթության, գիտության, մշակույթի եւ սպորտի նախարարության Բարձրագույն կրթության եւ գիտության կոմիտեի գլխավոր քարտուղարի տեղակալ Կարեն Ղարիբյանը և ԿԾԿ ԾԻԳ-ին ՀԱԱՀ-ի դրամաշնորհային ծրագրի ընթացքում մասնագիտական աջակցություն ցուցաբերող անհատ խորհրդատու՝ Արման Բարսեղյանը: Այցի նպատակը Հայաստանի բարձրագույն կրթության Նորարարությունների մրցակցային հիմնադրամի (ՆՄՀ) դրամաշնորհային ծրագրի ամփոփիչ մշտադիտարկումն էր: Բուհում աշխատանքային խմբին ընդունեցին ՀԱԱՀ դրամաշնորհային ծրագրի ղեկավար, ՀԱԱՀ Որակի գնահատման և ապահովման կենտրոնի որակի կառավարման բաժնի վարիչ Արա Ամիրյանը և Ագրարային ճարտարագիտության ֆակուլտետի դեկան Արման Սիմոնյանը: Մոնիտորինգային աշխատանքնային խումբը բուհի ներկայացուցիչների հետ քննարկեց դրամաշնորհային ծրագրի իրականցման ընթացքը, ինչպես նաև անդրադարձավ դրամաշնորհային ծրագրի նախատեսված ժամանակահատվածում ամփոփմանն առնչվող որոշ հարցերի: Հավելենք, որ ծրագրի ավարտը նախատեսվում է 2026 թվականի հունվարին: ՀԱԱՀ դրամաշնորհային ծրագրի ղեկավարը տեղեկացրեց, որ ծրագրով նախատեսված բոլոր գործողություններն ավարտված են և կենտրոնը պատրաստ է իր գործունեությունը իրականացնել՝ նպաստելով Ագրարային ճարտարագիտության ոլորտի կրթության արդիականացմանը ու հնարավորություն կտա բուհին այսօրվա աշխատաշուկայի համար մրցունակ կադրեր պատրաստել: Մշտադիտարկման թիմը դրանաշնորհային ծրագրի ղեկավարի ուղեկցությամբ շրջեց կենտրոնի ճարտարագիտական լաբորատորիաներում, աշխատասենյակներում ու լսարաններում: Բուհի ներկայացուցիչները նշեցին նաև, որ ՀԱԱՀ Գյուղատնտեսական ռոբոտաշինության և մեխատրոնիկայի («Ագրոբոտ») գերազանցության կենտրոնը երկրում և տարածաշրջանում եզակի կառույց է, որի հիմնական նպատակը ոլորտի կրթության և գիտության զարգացումը և ֆերմերներին ծառայություններ մատուցելն է։ Կենտրոնի լաբորատորիաներն արդեն ամբողջությամբ համալրված են նախագծով նախատեսված բոլոր լաբորատոր սարքավորումներովև ուսումնական ռոբոտներով։ Այցի ընթացքում ԿԾԿ ԾԻԳ-ին ՀԱԱՀ դրամաշնորհային ծրագրի ընթացքում մասնագիտական աջակցություն ցուցաբերող խորհրդատու Արման Բարսեղյանը բուհի ներկայացուցիչների հետ դիտարկեց դրամաշնորհային ծրագրի շրջանակներում ձեռքբերված սարքավորումներն ու ռոբոտները, դրանց համապատասխանությունը պայմանագրով սահմանված տեխնիկական հատկորոշիչներին, քննարկեց լաբորատոր սարքավորումների հնարավորությունները: Դրամաշնորհային ծրագրի համակարգող Արման Սիմոնյանը տեղեկացրեց նաև, որ ծրագրի շրջանակում ձեռքբերված սարքերի և ռոբոտների առկայությամբ պայմանավորված վերանայվել են մասնագիտական կրթական ծրագրերը և ծրագրի արդյունքում Ագրարային ճարտարագիտության ֆակուլտետում ներդրվել են ‹‹Թվային գյուղատնտեսություն›› և ‹‹Գյուղատնտեսական մեխատրոնիկա և ռոբոտաշինություն›› մասնագիտությունները՝ համապատասխանաբար մագիստրատուրայում և բակալավրիատում: Այս մասնագիտություններով սովորող ուսանողները ակտիվ ու խանդավառ մասնակցում են սարքավորումների և ռոբոտների կարգաբերման աշխատանքներին։ ՀԱԱՀ Գյուղատնտեսական ռոբոտաշինության եւ մեխատրոնիկայի («Ագրոբոտ») գերազանցության կենտրոնի պաշտոնական բացումը տեղի կունենա շուտով:
